सुनसरी १५ असोज
पुजाको लागि भनी भारततर्फ लैजाँदै गरिएकी दुई किशोरीको नेपाल भारत सीमाको भाण्टावारी नाकाबाट उद्धार गरिएको छ । सुनसरीका प्रहरी प्रवक्ता नरेन्द्रकुमार कार्कीका अनुसार सप्तरी घर भएका ती किशोरीहरुलाई भारततर्फ लैजाँदै गरिएको अवस्थामा भारतसँग सीमा जोडिएको सुनसरीको भाण्टाबारी नाकाबाट उद्दार गरिएको हो । कार्कीका अनुसार नेपाल र भारत तर्फका संयुक्त सुरक्षाकर्मीको टोलीले सीमा क्षेत्रबाट उनीहरुको उद्दार गरेको हो । शंका लागि सोधखोज गर्ने क्रममा किशोरी सँगै रहेका २ पुरुषलाई अनुसन्धानका लागि नियन्त्रणमा लिएको सुनसरी प्रहरीले जनाएको छ । प्रवक्ता कार्कीका अनुसार उद्दार गरिएकामा १९ वर्षीया किशोरी सँगै अन्दाजी २२ वर्षकी अर्की किशोरी समेत छिन् । किशोरी सँगै रहेका २ जना पुरुषलाई प्रहरीले नियन्त्रणमा लिएको छ । प्रहरी नियन्त्रणमा रहेका एक पुरुषले भने प्रहरी समक्ष आफु किशोरीको आफन्त रहेको बताएका छन् । नाताले भिनाजु पर्ने व्यक्तिले सालीलाई पुजाका लागि भारत लैजाने सहमति अनुरुप आफु उनीहरुको सुरक्षाकाको लागि संगै आएको भनी प्रहरी समक्ष बयान दिएको प्रहरीले जनाएको छ । यद्यपि सो विषयमा समेत अनुसन्धान भैरहेको प्रहरीको भनाई छ ।